Kitba ta George Farrugia – Promotional Officer fi ħdan l-Uffiċċju tal-Kummissarju għat-trattament xieraq tal-annimali

Iċ-ċittadini Ewropej jisħqu li l-futur tal-Ewropa jfisser li għandu jkun hemm aktar ħarsien u trattament xieraq tal-annimali (Animal Welfare). Wieħed mil-prijoritajiet taċ-cittadini Ewropej huwa ‘Il-ħarsien u t-Trattament Xieraq tal-Annimali’. Dan ħareg minn rapport tal-‘Eurogroup for annimals’, fejn huwa nnotat illi t-Trattament Xieraq tal-Annimali huwa essenzjali daqs kemm hija mportanti l-liberta’ tal-espressjoni. F’dan ir-rapport jingħad ukoll illi l-futur tal-Animal Welfare huwa sensittiv ħafna. Tant huwa sensittiv, illi għaċ-ċittadini Ewropej dan huwa qasam importanti daqs il-ġlieda favur it-tibdil fil-klima (climate change), it-tassazzjoni, kif ukoll daqs il-ġlieda kontra l-korruzzjoni (Eurogroup for Animals, 2019).

Minn dan ir-rapport ħareġ, illi wieħed minn kull seba’ parteċipanti enfasizzaw illi l-qasam u l-ħarsien u t-trattament xieraq tal-annimali huwa wieħed mix-xewqat tagħhom, u dan għandu jkun wieħed mil-prijoritajiet tal-Ewropa. Interessanti wkoll li joħrog minn dan ir-rapport, illi tlettax fil-mija (13%) miċ-ċittadini Ewropej saħqu, illi jekk ikun hemm aktar deċiżjonijiet favur il-ħarsien u t-trattament xieraq tal-annimali fuq livell Eworpej, dawn iċ-ċittadini Ewropej qalu li jħosuhom grati u kburin.

Il-futur tal-agrikoltura, is-sajd u l-produzzjoni tal-ikel huma uħud mil-prijoritajiet prinċipali illi l-Ewropa għandha tiffoka. Dan kollu huwa fundamentali sabiex tkun rispettata l-bijodiversità u jkun hawn aktar għarfien u promozzjoni dwar biedja organika, veġetarjaniżmu, kontroll fuq is-sajd u kontroll fuq l-annimali meta jkunu qed jiġu trasportati minn post għall ieħor, kif ukoll il-ħarsien u t-trattament xieraq tal-annimali b’mod ġenerali.

Il-konklużjonijiet ta’ dan ir-rapport isaħħu dak kollu li ħareġ mil-Eurobarometer fl-2016, fejn numru kbir ċittadini Ewropej enfasizzaw fuq l-urġenza u l-ħtieġa t’azzjoni dwar il-ħarsien u t-trattament xieraq tal-annimali. Rapport ieħor tal-Parlament Ewropew tal-2017 dwar il-ħarsien u t-trattament xieraq tal-annimali jiżvela, li minkejja l-appoġġ b’saħħtu tal-poplu Ewropej, il-liġijiet tal-Unjoni Ewropeja jeskludu speċi differenti. Għalhekk, uħud mil-liġijiet eżistenti għandom jiġu emendati sabiex jilħqu livell meħtieġ.

Fl-2019, il- Membri tal-Parlament Ewropej (MEPs) qablu li jagħtu l-appoġġ tagħhom lil Eurogroup for Animals dwar il-kampanja ‘Ħarsien u Trattament Xieraq tal-Annimali’. Reineke Hameleers, Direttur tal-Eurogroup jisħaq sabiex,

“Kemm il-partit Soċjalista Ewropej kif ukoll il-partit tal-Ħodor huma kommessi sabiex fit-terminu li-jmiss isaħħu l-qasam dwar il-Ħarsien u Trattament Xieraq tal-Annimali. Jiena nispera li issa naraw impenn simili minn partiti u kanditati Ewropej oħra f’din il-kampanja”

[Both the Party of European Socialists and the Greens have clear commitments to improve animal welfare in the next term. I hope we will now see similar commitments from other pan-European parties and candidates in the remainder of the campaign] (Eurogroup for Animals, 2019, par. 9)

Kif jidher ċar minn numru ta’ rapporti ppubblikati, it-tendenza favur il-qasam tal- Ħarsien u t-Trattament Xieraq tal-Annimali fost il-popli Ewropej qegħda dejjem tissaħħaħ u tiżdied. Dan kollu jħeġġeg u jitfa’ aktar pressjoni fuq l-awtoritajiet Maltin sabiex pajjiżna bħala membru tal-Unjoni Ewropeja, jikkontribwixxi u jagħti prijorita’ l-qasam tal-annimali bid-deċiżjonijiet u l-politika fil-qasam tal- Ħarsien u t-Trattament Xieraq tal-Annimali. Ukoll, minn dawn ir-rapporti msemmijja hawn fuq, jidher ċar illi l-kwistjoni tal-annimali, u l-Ħarsien u t-Trattament Xieraq tagħhom huwa ta’ nteress mhux għal xi pajjiż partikolari, iżda għal kull Membru Stat, inkluż pajjiżna.

Minħabba li llum il-ġurnata hawn aktar għarfien dwar il- Ħarsien u t-Trattament Xieraq tal-Annimali, dan il-fenomenu qiegħed iqajjem aktar interess u kuxjenza fost il-popli Ewropej, inkuż fost il-poplu Malti. Għalhekk l-impenn tal-awtoritajiet Maltin fuq il-qasam tal-annimali għandu jingħata prijorita’, kif ukoll il-qasam leġislattiv dwar l-annimali dwar it-trattament xieraq, għandu jkun fuq-nett tal-aġenda.

Minn naħa l-oħra, matul is-snin, pajjiżna ra’ qabżiet kbar fil-qasam tal-annimali u t-trattament u l-ħarsien tagħhom. Wieħed isemmi l-ħatra ta’ Kummissarju fl-2014, kif ukoll diversi kampanji edukattivi u tibdil f’diversi liġijiet fejn għandu x’jaqsam ma’ moħqrija tal-annimali. Wieħed jgħid, dan kollu mhux biżżejjed? Kif joħroġ mir-rapporti msemmija hawn fuq, jidher ċar illi l-qasam tal-Ħarsien u t-Trattament Xieraq tal-Annimali huwa kruċjali sabiex nissalvagwarjaw u nsaħħu l-qasam dwar il-Ħarsien u t-Trattament Xieraq tal-Annimali. Kif jista jsir dan kollu? Bħala membri u ċittadini Ewropej għandna nipparteċipaw fejn jidħlu konsultazzjonijiet pubbliċi kif ukoll f’intervisti li xi drabi jsiru sabex insaħħu aktar l-għarfin fost il-poplu Malti, kif ukoll nieħdu ħsieb illi l-annimali jkollhom trattament xieraq.

Ċittadini Maltin, bħal ċittadini oħra Ewropej għandom id-dritt isemmghu leħinhom kemm fuq livell lokali kif ukoll fuq livell internazzjonali sabiex issir aktar pressjoni fuq l-awtoritajiet Maltin kif ukoll Ewropej, sabiex il-Ħarsien u t-Trattament Xieraq tal-Annimali jkun fuq quddiem tal-aġenda. Għalhekk, bil-parteċipazzjoni kif ukoll bl-attiviżmu tagħna bħala Maltin, inkunu qed insaħħu l-vuċi tal-annimali, vuċi li l-annimali m’għandhomx. Għalhekk, irridu nkunu aħna bħala poplu Malti, flimkien mal-poplu Ewropej sabiex il-Ħarsien u t-Trattament Xieraq tal-Annimali jkun trattat bħala prijorita’, kif fl-aħħar mil-aħħar, joħroġ mir-rapport tal-Eurogroup for Animals.

Reference

Eurogroup for Animals. (2019). The future of Europe means more animal welfare, say Europe’s citizens.

Press Release, Brussels. Irkuprat minn
https://www.eurogroupforanimals.org/news/future-europe-means-more-animal-welfare-say-europes-citizens​